Institute of Economic Research (IERPP) kwankyerɛfoɔ panin, Prof. Issac Boadi, apo nsusuwiiɔ a ɛne sɛ wɔbɛtrɛ Ghana mampanyin berɛ mu afiri mfeɛ nan akɔ mfeɛ nnum, a ɔkyerɛ sɛ saayɛ no bɛma demokrasi mu asɔdeɛ ayɛ mmerɛ na ama ɔman no da hɔ ama aban bɔne mmerɛ tenten.

Ɔkaa yei berɛ a Attorney-General Dr Dominic Ayine daeɛ adi sɛ aban no agye Constitutional Review Committee afotu a ɛne sɛ wɔbɛtrɛ Mampanyin ne Mmarahyɛbadwafoɔ berɛ mu afiri mfeɛ nan akɔ mfeɛ nnum no to mu.

Sɛnea Attorney-General kyerɛ no, afotu no botaeɛ ne sɛ ɛbɛma aban ahorow anya mmerɛ pii de adi wɔn nhyehyɛeɛ ne nkɔsoɔ dwumadi ahorow ho dwuma yie, ɛfiri sɛ mfeɛ nan amanyɔmbra berɛ a ɛwhɛ hɔ seesei no sua dodo.

Berɛ a ɔrekasa wɔ JoyNews AM Show so wɔ Fiada, Kitawonsa 31, Prof. Boadi kaa sɛ ɔnni asɛm biara tia mfeɛ hyɛ a wɔpɛ sɛ wɔyɛ ama mampanyin akansifoɔ no, a ɔsiiso sɛ ɛnnsɛ sɛ wɔgyina mfeɛ nkutoo so bu kanamahoɔden ho aten.

“Sɛ wo hwɛ mfeɛ hyɛ no a, wotumi nya obi a wanyin a ɔtumi dwen yie. Wotumi nso nya abofra a ne ti mmerɛ na ɔwɔ ahoɔden. Enti minni asɛm biara tia mfeɛ hyɛ no,” ɔno na ɔkaa sɛe.

Nso, ɔmaeɛ daa adi pefee sɛ ɔnsɔɔre nnti nsusuwiiɔ a ɛne sɛ wɔbɛtrɛ mampanyin berɛ mu afiri mfeɛ nan akɔ mfeɛ nnum no akyi.

“Me haw ne mfeɛ nnum berɛ no,” ɔna ɔkaa sɛe.

Prof. Boadi kassa tiaa adwene a ɛkyerɛ sɛ mfeɛ nnum berɛ bɛma aban ahorow anya mmerɛ pii de adi ɔman no so yie berɛ a wɔasɛe bosome pii de apaw mpaninfoɔ na wɔasiesie wɔn ho ama abatoɔ a ɛreba no.

Ɔgyinae sɛ Ghana amanyɔmbra mmerɛ mmma aban ahorow kwanya a wɔmmu mu a wɔtaa ka ho asɛm no ɛfiri sɛ amanyɔ dwumadi ahorow hyɛ aseɛ ntɛm ara wɔ amansan abatoɔ akyi.

“Akyinnyeyeɛ no ne sɛ aban ahorow sɛe bɛyɛ bosome nsia de paw mpaninfoɔ na wɔsɛe afe foforɔ de siesie wɔn ho ama abatoɔ, a ɛgya mfeɛ mmienu pɛ ama ɔman so bu pa. Nso wɔ Ghana mu no, abatoɔ akyi pɛɛ no, amanyɔsɛm hyɛ aseɛ bio. Abatoɔ nsɛm hyɛ aseɛ ntɛm ara,” ɔno na ɔkaa sɛe.

Ɔbisai nso sɛ ebia nsakyeraeɛ a wɔpɛ sɛ wɔyɛ no bɛhia ɔman mu abatoɔ (referendum) anaa, a ɔhyɛɛ no nsow sɛ amanyɔmbra no mu nsɛm a ɛyɛ den no, gye sɛ abatowfoɔ pene so ansa na wɔatumi asesa.

Ɛwom sɛ Attorney-General akyerɛ sɛ dwumadi boayikuo bɛkyekyɛ nsusuwiiɔ no mu gyina amanyɔmbra kwan a ɛeho hia ama wɔde adi dwuma so deɛ, Prof. Boadi kaa sɛ mmara mu animdefoɔ na ɛwɔ sɛ wɔkyerɛ sɛ ebia mampanyin berɛ a wɔpɛ sɛ wɔtrɛ mu no hyɛ nsɛm a ɛyɛ den no ase anaa.

“Deɛ mete aseɛ ne sɛ wɔakyekyɛ nsusuwiiɔ no mu kuo-kuo, a nea ɛhia referendum nso ka ho. Mmaranimfoɔ na ɛwɔ sɛ wɔsi so dua sɛ ebia saa nsusuwiiɔ yi ka ho anaa,” ɔno na ɔkaa sɛe.

Prof. Boadi tooa so gyinae sɛ mampanyin berɛ a wɔbɛtrɛ mu no tumi de nsunsuonsoɔ a ɛmu yɛ den ba sɛ Ghanafoɔ paw aban a entumi nyɛ dwuma anaa porɔeɛ aka ho a.

“Mente saa nkɔmmɔbɔ yi ase koraa. Dwene ho sɛ yɛnya mampanyin a ɔnnyɛ dwuma, anaa mampanyin a ɔyɛ porɔeɛ, anaa obi a ɔreda wɔ dwuma no so, na ɛwɔ sɛ ɔman no twɛn mfeɛ nnum ansa na wɔatow aba bio. Anka yɛawie,” ɔbɔɔ kɔkɔ.

Ɔgyinaeɛ sɛ mampanyin berɛ a wɔbɛtrɛ mu no nnyɛ anohedoo ama Ghana amambu haw ahorow no, a ɔsii so dua sɛ akwan a ɛmu yɛ den a wɔde bɛbisa akontabuo, sen sɛ wɔbɛma mfeɛ no ayɛ tenten wɔ dwumadibea no, na ɛwɔ sɛ ɛyɛ amanyɔmbra nsakyeraeɛ no botaeɛ titiriw.